Tradisyon ng "Birthday Project"

ni Kay

Mahirap magdaos ng birthday celebration kung ang birthday celebrant ay wala sa ating piling!

Minsan natatapat ang birthday at iba pang okasyon tulad ng Father's/Mother's day o kaya ay mga anibersaryo ng ating kapamilyang seafarer, sa mga buwan kung kailan siya ay nasa dagat. Pero dahil sa tipikal na malambing ang mga Pilipino, maraming mga pamamaraan ang magagawa upang mapalalim ang mga okasyon na ito. Kung tutuusin, maaari pa ngang gawing oportunidad ang mga okasyon na ito upang magsimula ng isang malalim na tradisyon na magbubuklod sa mag-anak.

Iparamdam ang taos-pusong pagbati.

Sa simpleng paraan ng pagtawag sa kanila, maaari nating ipamalas ang ating pag-alala sa kanilang kaarawan. Maaari ring gamitin ang pagkakataon na ito upang sabihin ng bawat miyembro ng pamilya ang mga bagay na kanilang na-aappreciate sa may kaarawan. Halimbawa ay puwedeng gamitin ito ng mga anak upang maiparinig sa kanilang ama na sila ay nagpapasalamat sa kanyang pagtitiyaga na maghanapbuhay upang sila ay makapag-aral.

Maaari rin na gamitin ang okasyon upang imbitahin ang mga natatanging kaibigan ng inyong pamilya upang maraming pagbati ang ating maipabatid sa ating mahal sa buhay sa barko sa isang tawag. Ang ganitong gawain ay maaaring makabawas sa kalungkutan na kanyang nararamdaman at maging mas espesyal ang mensahe na kanyang maririnig.

Paggawa ng "Birthday Project."


Magandang tradisyon na umpisahan ng pamilya, lalo na habang bata pa ang mga anak, ay ang paggamit ng mga birthday ng seafarer upang panahon na gumawa ng isang proyekto kung saan magugunita ng buong pamilya ang nasa dagat. Ito ay makakatulong na maparamdam ang pagiging malapit ng pamilya sa isa't-isa.

Halimbawa ng proyekto ay paggawa ng "home-made" na card o streamer ng pagbati o di kaya ay pag-organisa ng simpleng presentation tulad ng sayaw o awit.

Bagamat simple lang ang mga bagay na ito, makakatulong ito na mapalalim ang ugnayan ng pamilya. Ito ay sa pamamagitan ng:

a. Ang tradisyon ng intensiyonal na pagsasantabi ng pamilya ng oras para sa seafarer bagamat wala siya ay makakatulong upang kahit sa emosyonal na larangan, buhay ang presensiya niya sa tahanan. Maganda itong tradisyon ng magbubuklod sa naiwang asawa at anak. Mayroon pang maaasahang surprise ang may birthday sa kaniyang pagbabalik na nakakataba ng puso lalo na kapag naiparamdam na personal ang pagbati at ang proyekto ay pinaghirapan.

b. Ang gawain din ng pag-brainstorm sa mga gustong proyektong gawin para sa nasa barko at pagkonsulta sa bawat isa ay tumutulong upang ang pangungulila ng naiwang pamilya ay maranasan ng sama-sama. Sadyang malungkot ang mawalay sa isa't-isa ngunit kung may pagdaramayan ang naiwang pamilya ito ay mababawasan. Maaaring gawing daan ang mga proyektong ito upang mapag-usapan ang mga pagka-miss ng bawat isa sa kanilang mahal sa buhay na seafarer.

Normal ba na magkaroon ng iba?

ni Kay


Si Lourdes, isang asawa ng marino ang may lungkot na nagsabi sa akin. "Alam ko naman na may mga babae ang asawa ko sa barko. Pero lalaki siya, may pangangailangan. Basta sa akin siya umuuwi, okay na 'yun."

Hindi na marahil iba sa atin ang makarinig ng mga biruan na ang kalalakihan ay iba ang pangangailangang seksuwal kaysa kababaihan. At kung sisiyasatin ay may katotohanan ito. Ang babae at lalaki ay nilikhang sadyang magkaiba--- di lamang sa pisikal na larangan kung hindi sa emosyonal na rin. Kailangan talaga ng pagkilala at paggalang sa mga pagkakaiba na ito upang mapalago ang isang ugnayan.

Ngunit ang ibig sabihin ba nito ay normal na magkaroon ang isang may-asawang seafarer (babae man o lalaki) o ang kanyang naiwan ng pisikal o emosyonal na relasyon sa iba?

"Ano ang pakiramdam mo sa ganitong sitwasyon?" aking tanong sa kanya.

"Malungkot, siyempre," ang kanyang tugon. "Pero tinanggap ko na lang. Ito kasi yung advice sa akin ng ibang asawa ng seaman. Basta intindihin ko na lang daw na palipas-oras lang sila, pero ako ang asawa."

Malalim ang sinabi ni Lourdes, at bakas sa kanyang mukha na ito ay isang bagay na mabigat sa kanyang kalooban. Sigurado ako, batay na rin sa aking mga karanasan sa pakikipag-usapan sa iba pang seafarer at kanilang mga asawa at anak, na ito ay di lamang kay Lourdes nangyayari. Ito ay problema ng seafarer o di kaya'y ng kanyang asawa, babae at lalaki.

Ang Tawag ng Buhay Mag-asawa

Ang Buhay Mag-asawa ay sadyang puno ng hamon. Ang mag-asawa nga na araw-araw ay nagkikita at nagkakaroon ng mga problema ukol sa damdamin ng pagkaulila at pagiging isa o loneliness. Lalo na siguro ang mga seafarer at ang kanyang asawa na minsan lamang sa isang taon kung magkita! Ito ay isang katotohanan na dapat harapin---- at tugunan sa akmang paraan.

Ang buhay mag-asawa na lumalago ay nakasalig sa ganap na pagbibigay ng sarili sa isa't isa. Ang ibig sabihin nito, sa pinakamalapit na relasyon ng pag-aasawa, nangangailangan ng pagbibigay ng iyong puso, diwa at katawan , at pagpapanatili ng buhay ang ugnayan sa lahat ng pagkakataon. Hindi natin maaaring hati-hatiin at sabihin na sa taong ito ko ibibigay ang 10% ng aking sarili at sa kanya naman ang 90%.

Sa pangmatagalan na pagtanaw, ang ganitong gawain ay kadalasang nakapagpapalayo sa mag-asawa. Minsan iniisip natin, mabuti na ang makipag-fling ako (o kaya ay siya) sa barko kaysa naman tuluyan na naming iwan ang isa't-isa. Subalit sa bawat desisyon natin na gawin ang mga fling na ito (a) may nababawas sa ating pagtingin sa ating commitment sa bawat isa, at (b) hindi natin natututunan ang mga kasanayan na dapat natin matutunan sa pagdala ng kalungkutan.
Ang halaga ng value clarification sa mag-asawa

Ang ugnayang mag-asawa ay maaaring patibayin o di kaya'y buwagin ng kalungkutan--- nasa atin na kung alin sa dalawa ang ating hahayaan na mangyari. Mahalaga na magtalaga ang mag-asawa ng panahon upang pag-usapan ano ang mga mahahalaga sa kanilang dalawa bago pa man magkahiwalay at ano ang kanilang inaasahan sa bawat isa. Ang ganitong pag-uusap ay isang paraan ng paglilinaw ng mga maaaring gawing tulong sa pagpapatibay ng pagsasama.

Pagpapakilala

ni Padre Nilo E. Tanalega, SJ

Mahirap ang buhay sa laot; mahirap ang buhay marino!
Kung minsan sa pagtaas ng mga alon, di mo alam kung ganong kataas pa yan, at paano ang pagbagsak.

Sa karanasan ng tao, subalit, ang tubig ay ang nagbibigay buhay.
Ito ay ang tugon:
Sa pagkauhaw ng tao
Sa pandilig ng halaman at puno
Sa pagbigay aliwalas sa mga naiinitan, tao man o hayop
Sa paglinis ng mga maruming sisidlan o lawak ng kinaroroonan

Kahit na sa bawat pagpatak ng ulan:
Mabibilang mo ang ginhawa na dala nito
Ang paglaki ng mga tanim sa bukirin
Ang mga araw na lumilipas … mula sa bagyo tungo sa tagtuyot

At sa ating kuwento ng pananampalataya, ang tubig ang:
Hinati sa lupa at gawa na rin ito ng Maykapal
Nilagyan ng sanggol na maglilitas ng bayang Israel sa pagkaalipin
Hinati uli sa pamamagitan ni Moises upang maraan ang aping Israel
Eksena ng pagpapahayag ni Juan sa ilog Jordan
At, ang huling pumatak sa katawan ng Tagapagligtas na nakabayubay sa krus

Sa tubig kayo naroon. Ito ang sumasalo sa inyo. Ito ang kinabubuhay ninyo.

Makidalo sa ating “Daungan” – upang ang tubig ng kaligtasan ay tuluyang humantong sa inyong kandungan.